De la xuntanza de dos grandes de la Lliteratura Infantil y Xuvenil namás que pue salir un llibru perguapu. Asina, el poeta Aurelio González Ovies y la ilustradora Ester Sánchez dan a la lluz, o asoleyen que ye más prestoso, el llibru «Una escuela es una casa», editáu por Pintar-Pintar, esa editorial que, tanto n’asturianu como en castellán, tiennos avezaos a interesantes llibros de LLIX.
El poeta, Aurelio, va repitiendo en cada un de les cuartetes l’estribillu «Una escuela es una casa», amestándo-y llueu nuevos elementos que van esplicando la idea qu’elli tien de lo qué ye la escuela. «Una escuela es una casa/ donde cabe el universo/ donde conviven los mapas/ con todos los ríos dentro». Pero la enumeración nun ye sólo pedagóxica, sinón que va tornándose en dalgo que cinca al sentimientu, a lo entrañable, a lo carnal. Asina, al amor de los llibros, a la educación nel cariñu y el respetu, al placer del aprendizaxe, al mundu de los sueños: «Una escuela es una casa/ llena de conocimientos/ con escaleras que suben/ hasta el desván de los sueños». Tamién una forma de «sumar» amigos, y «restar» tristezas, hasta llegar al final del llibru onde ya una escuela dexa de ser sólo una casa, pa pasar a ser «la nuestra» casa:
Una escuela es nuestra casa
desde que somos pequeños.
Sus ventanas dan al mundo
que admiro, cuido y aprendo.
Pero too esto, esti guapu poema infantil, quedaría namás neso, nun poema, si nun viniere acompañáu poles guapísimes ilustraciones d’Ester Sánchez. Son elles, ye ella, la que lo eleva a la categoría de llibru. D’un llibru pa lleer nel aula, pero tamién en casa, almirando eses páxines enllenes de lluz y color, evocadores, imaxinatives. Nunca meyor que nesti casu, testu y dibuxu van al empar pa llograr una oxetu preciosu per dientro y per fuera. Paga la pena regalalu a dalgún neñu o neña al que queramos, pero tamién pa tenelu nosotros nesa biblioteca que dalgún día heredarán los que vengan detrás.