Poema del poeta asturiano del libro 34 poemes (a imaxe del silenciu) incluido en el programa de la TPA (Televisión del Principado de Asturias) 'De Romandela 2017' dedicado a Gozón el 5 de mayo de 2017. Laude Martínez, conductor de la emisión, pone voz a los versos de Aurelio González Ovies.
Programa completo AQUÍ
PIDO ser esti mesmu yo nel que viví, con toles míos maníes, con tolos míos defeutos. Díxilo munches veces y otra vez lo repito: quiero nacer ellí, onde ronca'l Cantábricu contra'l cuerpo oxidáu del mio Llumeres, un puerto, mui al norte, con galipote y mofu y botes y lancheros. Escuchar los glayíos d'unes muyeres buenes llamando -dende la nueche alta- a los sos homes, porque ta la mar mala y mal iviernu. Que la mio imaxe primera seya la to caruca, madre mía, y lo smios deos te toquen, dende yá mui de neñu, como'l que posa un poco de brisa nuna flor, como'l que tien mieu mancar la piel d'algo tan tierno.
Ellí mesmo, nunca casina baxa con balcones azules a la vera'l camín ente'l faru y el cielu. Al norte, muncho al norte, -casi en plenu abandonu- onde toles mañanes sonaba la sirena porque morría un mineru. Que los mios hermaninos quieran ser pa siempre los míos; y un domingu mio pá nos amarre un columbiu nes cañes más gordes del peréu. Que tean nel so sitiu les coses que me falten y que fueron los güeyos qu'aprendí, qu'un día nun abrieron les sos contraventanes, nin podaron los árboles, nin tendieron la ropa nin salieron xamás al panaderu. Ellí, tien que me ser ellí, xusto onde sentí tantu fríu per fuera, tantes ganes de tanto, como cariñu dientro. Al norte, muncho al norte, entre maízos fondos y horros altaneros, bazo los qu'entovía dalgunos díes, mui ceo, oigo cómo clabuña'l filu a les gadañes el martiellu del tiempu. Por eso, cuando me toque dir, pa que nun se nos faiga abegosu'l realcuentru, que me metan puñaos de salmoria na voz y, nos remos del alma, que m'añuden to nome, madre mía, en llugar de cruciame les manes sobre´l pechu.